[長笛迷思 3] 我先啱音...真係咩?

O 2020/10/19    瀏覽: 201 次

「你好sharp呀」、「我一度都綠燈呀」、「我先啱音,你錯!」每當聽到尼幾句説話,即係代表咗講嗰個人認為自己啱音,要人地跟佢。首先,音準無絕對,啱唔啱音係睇你同人地撞唔撞。第二,綠燈亦不代表一切,尼部綠燈,第部可以紅燈 (唔係講緊你部機壞,可以繼續睇落去)。所以呢,除非你係彈鋼琴,你先可以話我好啱音 (其實我勸你都唔好),因為責仼唔係你,而你亦唔可能短時間內改變倒部琴。咁點先係啱音同咩係音準呢?

世上偉大(但要小心用)既音樂發明 - 調音器

要知樂器啱唔啱音,最基本就係用調音器 (tuner)。相信小朋友自從得知尼個世界上有調音器之後,佢地知道既就係綠燈就等於啱音。尼件事本質無錯,因為調音器結構上係咁樣用。當接收到某一個聲音,佢就會找出相應最接近既頻率(frequency),然後透過紅綠燈話你知你同應該既頻率相差了多少。左邊紅燈代表太低 (flat),右邊紅燈就代表太高 (sharp),中間綠燈代表”啱音”。

喺吹管樂器上,如果音太低既時候,我地需要縮短樂器內氣流可行既距離,所要需要插入啲樂器上可以調校既位置。如果音太高,我地就需要增加樂器內氣流可行既距離,所要需要拉出啲樂器上可以調校既位置。弦樂和敲擊樂都係類似既物理原理去調校弦線或鼓皮既鬆緊程度尼改變音高。

Tuner上個440係咩尼? 又可以調高低?

440普遍指既係將A音*設定為440Hz為標準,而其他音就會根據物理學原則而能夠計算出它們的Hz。但其實440並唔係全球統一,但可以算係其中一個標準。喺歐洲國家另一個可能係442,德國樂團可能更加選用443添。以香港尼講,雖然無一個特定組織白紙黑字咁規定,但相信大部份搵倒既鋼琴都係以440去調音。

值得一提,音樂歷史發展以尼一直不斷有上升趨勢(pitch inflation),巴洛克時期音樂大致為415Hz,只係大致既原因係嗰時 (講緊300幾年前),世界唔同地方都可能有少許不同,例如法國可能會出現392Hz為A音標準。之於點解現今去聽巴洛克音樂可能會話低半度,原因正正係以415Hz做標準既話就大約(重點係只係大約)低半度。

咁點解調完樂器後都仲係走音?

如果可以set好咗支樂器後就永遠啱音,咁應該所有樂器都易吹得多。音準仲會因應氣速、氣量、吹奏角度甚至溫度而有所影響。

當然,我地首先可以嘗試以下方法先把樂器基本上有理想既設置。我地可以用泛音 (harmonics)尼檢查樂器。喺長笛上,我地可以用低音D指法吹奏高13度(compound perfect 5th)既A音。如果低音D指法既A跟真實A音指法聽起來音高一樣,那麼樂器設置就應該理想了,其餘要解決就是自己吹奏技巧了。

我先簡潔整理一下每個因素點影響音高:

氣速 ↑ —> 音高
氣量 ↑ —> 某程度令氣速 ↑ —> 音高
吹奏角度向上 —> 音高
溫度↑ —> 音高  

宜家就應該清楚了,如果覺得音太低,我地就要提高氣速,簡單做法就係要更加support氣流。相反音太高既話,就可能自己要放鬆啲,可能身體太緊或吹得過份多氣了。 (尼個可能需要同自己老師研究一下,畢竟係對演奏十分重要既一環)

十二平均律 vs 純律

較為進階既朋友可以再進一步了解以下概念。首先,十二平均律指將一個八度平均分十二份,就好似鋼琴咁;而純律係根據特定音程 (Major 3rd和Perfect 5th)來計算整個八度音既分隔。

一般來說,純律聽起來更加和諧/啱音,所以吹長笛夾其他樂器時需要考慮這一點。基本上,minor 3rd應該把三度吹高一點,Major 3rd應該把三度吹低一點,Perfect 5th就應該把五度吹高一點。要改變幾多呢,可以靠聽差音(difference tone)。當兩個不同音同時吹奏時,理應房間內會聽到第三個音(係有啲詭異),如果那個差音跟正在演奏的兩個音和的話,那就應該啱音了。如果想聽聽有咩分別,可以去看看wkw_music喺Instagram幾個關於純律同十二平均律既比較 ( https://www.instagram.com/p/CEHBVViJkZe/?igshid=9kyc6p108sch )。

啱音最終都係想聽起尼和諧

唔好忘記,音樂除咗講求啱音外 (實質Hz既準確),有其他音樂因素可能會影響聽起尼會唔會撞。首先影響好明顯係顫音 (vibrato)。如果一個人用好闊既顫音而另一人用比較淺和快既顫音,兩個聽起尼已經唔夾,所以同人夾音樂時要好聽就要夾埋vibrato既方向、密度和速度等。

音色亦會影響,但今次唔多講住,因為下星期我地會討論音色。但如果兩個人要好聽,就一定要注意音色係咪一致。

希望大家對於音準既概念可以開始由綠燈去到關心埋其他方面吧。

下一次,我地講吓音樂裏面既顏色。

~~~~~~~~~~~~~~~~~~~~~~~~
延伸參巧

* A音指既係middle C對上既A,亦可理解為A4

432Hz vs 440Hz vs 448Hz音樂比較: https://youtu.be/kwAUv-IotC0

純律音樂比較: wkw_music (Wong Ka Wing Karen) 關於純律共有3個示範,分別為minor 3rd, Major 3rd和minor 7th (Dominant 7th和弦): https://instagram.com/wkw_music?igshid=1rlr5mir05pb5

Marco Leung 梁俊彥
www.cymarco.com