樂人谷 musicvalley.com.hk｜SoundTube論｜創作電子音樂的危與機｜DipsyHA｜香港本地獨立電子音樂組合｜

最近去搵D電子音樂聽，聽到一個荷蘭好出名既DJ及作曲人Hardwell 既音樂。佢既作品係好聽既，但手法同每首音樂既感覺都好相似，點解會咁呢？我認為呢個唔止係佢面對既問題，而係所有作電子音樂既人需要面對既問題，因為呢個係創作電子音樂既「危機」。

任何創作，其實都唔會100﹪係自己功勞，作器樂，我地靠前人發明樂器，靠演奏者演奏，或者D樂理知識；作流行歌，會依賴別人研發既Sequencing 軟件，Midi技術等等。而電子音樂，更加需要靠一大班Sound Designer 同 Programmer 等研發人員既努力，靠前人既比例，高於一般非電子音樂。

佢地設計音色，效果器，做一大堆運算出黎，製造出D好靚既聲出黎，一聽就會覺得正既聲。一開頭玩電子音樂，可能我地只係當佢地係聲源，樂器聲，或者係美化音樂既工具。不過依家再發展，D軟件發展得愈黎愈user friendly同用途廣泛，佢地唔止俾一隻音色你，直頭係俾一段樂段俾你，有D係loop，有D係人常用既樂句。發展到呢個階段，其實作“好聽”既野真係唔難，但作有個人Style既野，反而變得難左，因為你既創作工序，有一大部分放左落去「選擇」度，而呢D選項，並唔係由你創作。

不過，作曲人既工作點止係「選擇」呢？我地仲要安排結構，作旋律，諗和聲，溝聲，諗點同歌詞發生關係．．．仲有一大堆野可以玩，呢D野既組合，全部都係可以表露到作曲人Style既工具。如果單純被“好聽”帶領，而忽略左個人Style，實在有點可惜。又或者，如果作曲人可以同Programmer合作，製造一個佢地獨有既聲音，亦可能能將個「危」變「機」。

﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣﹣
大家可以留意SoundTube經常演出既兩首歌《紋妝筆》同《羞澀》，呢兩首歌Live version既創作，其實係將Programmer同Composer呢兩個角色融合。一方面有基本既曲詞編創作，另一方面我地用Programming software - MaxMSP製造基礎音色，設計音樂規則，編寫聲音同聲音之間既關係等。
（附圖為MaxMSP介面）

《紋妝筆》

《羞澀》

By DipsyHA@ SoundTube

作者簡介

DipsyHA 於2003年邂逅音樂，2008年正式相戀並對她作深入了解，2015年於香港演藝學院作曲系學士畢業，師隨現代音樂作曲家張珮珊博士及多媒體藝術音樂家許敖山先生研習作曲。此外，夏氏還熱衷於爵士鋼琴及爵士小號演奏，師隨蘇偉雄博士及香港管弦樂團小號首席麥浩威先生，除了傳統樂器的演奏及創作外，夏氏於電子音樂創作及研究亦有豐富的經驗，現為實驗流行音樂樂隊﹣SoundTube的成員，主要擔任作曲編曲及電子音樂程式編寫工作。

聯繫作者

https://www.facebook.com/SoundTube.ID/

【樂人專欄：SoundTube論】創作電子音樂的危與機－DipsyHA@ SoundTube

最新節目活動