【樂人專欄】死亡之吻 - KDub
最近同一班粵語歌詞同好者討論陳詠謙嘅歌詞。上一年，「陳詠謙之亂」在網上熱議，陳作品「別來無恙」中嘅一句「我現時自己肯做飯」更成為網上潮句。講真，自己對陳詠謙嘅歌詞並無反感，甚至認為偶有佳作！「飲啦小氣」中一句「哎呀呀呀，死黨你唔准死」實在擊中咗一班飲飽食醉嘅廢佬嘅小小心靈！可惜「陳詠謙之亂」後，陳在廣東歌填詞人一欄確實少咗出現。
詞友中夕迷講嘢都算中肯。類似金句換咗夕爺歪文寫的話，「做隻貓做隻狗」就可以賺人熱淚。問題係陳詠謙未踩入名筆之殿堂不特只，佢可能不知不覺做咗樂壇奸角。
其實係咪不知不覺呢？陳詠謙除咗係合約填詞人之外，仲係合約歌手。咁做得歌手嘅，當然就要有形象設計啦。搵番陳2016尾歌手出道主打「脂肪葡萄」嘅文案，就可以對陳詠謙嘅定位略知一二。而呢個定位係同坤哥出道嘅宅男underdog形象南轅北轍。唔係話坤哥嗰套係走紅嘅不二之法，但係著住短褲仔衝上台喊到眼鏡起晒霧氣真係比「我叻仔我可以肥」(爭在未講埋吹咩) likable多好好好多！當然坤哥奪得男歌手大奬後，問題就嚟嘞，一位靠宅男underdog形象上位上到上咗大台攞獎後，又點說服歌迷自已係一位宅男underdog呢？咁呢個就係另一個話題嘞！
陳詠謙2005開始出版詞作，2010至2017年踏入高山期。而開始走向低谷竟然係由攞填詞人大獎之後。唔係攞完獎會仲紅㗎咩？陳嘅高山期產量都算高，而且有唔少hits，年輕一輩嘅up and coming歌手都鍾意同佢邀詞。問題係佢去到夕爺歪文嘅水平未呢？我知，年年都係夕爺歪文攞獎係悶啲，但係一日仲有觀眾戥鄧萃雯喺2004輸咗個視后后冠俾黎姿唔低，就一日仲有聽眾鬧陳詠謙2018唔值得攞詞人大奬！
電台慾捧年輕詞俊上高峰，讓樂壇多一道彩虹，推動樂壇薪火相傳，同時又可以制造一下話題，令頒奬禮生色。呢個諗法本來係出於多贏思想，偏偏變相賜下死亡之吻。
