【樂人投稿】SoundTube論系列:精緻多變的流行音樂作曲家﹣馮翰銘

O 2016/08/17    瀏覽: 2813 次

【樂人投稿】SoundTube論系列:精緻多變的流行音樂作曲家﹣馮翰銘

一向都好欣賞馮翰銘,由《留白》開始,己經對佢既音樂情有獨鍾,佢係好少有能夠做到流行,又好有強烈自己音樂風格既作曲家。到最近買了佢既新碟《Chapter II – Stars of My Universe》,一聽依然係驚喜十足!非常喜歡,一隻好全面而且好高質的製作。唔同觀眾可以係裡面搵到滿足,整隻碟以舊歌為主題,鍾意舊歌既朋友,你會鍾意;鍾意聽古典音樂既你都會鍾意,因為碟中有幾首係精緻純音樂,全器樂既作品;連電子音樂愛好者,你都會對好滿意,佢除左用電子音樂既聲音,仲有用好多有趣既電子音樂手法。

隻碟頭四首歌《繾綣星光下》、《告別校園時》、《知己知彼》及《霧之戀》,都係器樂作品黎,每首曲都有鋼琴,再配合其他樂器。而我最鍾意就係《知己知彼》,整首歌好groovy,用小號唔同既音色交織,段落有好多,音樂元素有好多,但因為佢處理節奏同段落連接既手法做得好出色,所以聽起黎都唔會混亂。另外有一點值得一提及讚揚,買佢隻碟仲送埋其中幾首音樂既詳細樂譜(唔係lead sheet,係每粒音寫哂既五線譜!)
 
由《霧之戀》開始,音樂多用人聲做樂器,以及加入電子音樂既元素,係呢一部分,最有趣既歌曲非《
你親愛的》莫屬!一開始就用舊式遊戲機既音色,帶你去番GameBoy,任天堂年代。除此之外,馮翰銘將原曲旋律拆散,並重新組合,整個感覺變得好新鮮,但我地唔會因此而唔認得首原歌,始終大家對”Sayōnaraoh”太深刻了。


而聽完《石頭記》及《情人》之後,令我感受到佢係電子音樂手法都有一套,雖然佢係入面用既手法其實係當代音樂(Contemporary Music)入面唔算好新鮮,但係放佢放入流行音樂,係香港黎講真係好突破性,亦鼓舞到一班作曲家將嚴肅音樂打入香港流行市場既信心。 誠意向大家推介 馮翰銘《Chapter II – Stars of My Universe》


DipsyHA@SoundTube


作者簡介

DipsyHA 於2003年邂逅音樂,2008年正式相戀並對她作深入了解,2015年於香港演藝學院作曲系學士畢業,師隨現代音樂作曲家張珮珊博士及多媒體藝術音樂家許敖山先生研習作曲。此外,夏氏還熱衷於爵士鋼琴及爵士小號演奏,師隨蘇偉雄博士及香港管弦樂團小號首席麥浩威先生,除了傳統樂器的演奏及創作外,夏氏於電子音樂創作及研究亦有豐富的經驗,現為實驗流行音樂樂隊﹣SoundTube的成員,主要擔任作曲編曲及電子音樂程式編寫工作。
 

聯繫作者